ਇਕ ਗ਼ਜ਼ਲ ਦੋ ਨਜ਼ਮਾਂ / ਨਿਰਮਲ ਦੱਤ

 ਹਫ਼ਤਾਵਾਰੀ ਕਾਲਮ

ਸ਼ਬਦ ਚਾਨਣੀ---ਨਿਰਮਲ ਦੱਤ

//

ਗ਼ਜ਼ਲ

ਜ਼ਖ਼ਮ ਸਹਿਲਾਅ ਰਹੀ ਹੈ

ਜੇ ਬੁਲਬੁਲ ਗਾ ਰਹੀ ਹੈ.

ਨਦੀ ਦੀ ਬੇਵਸੀ ਹੈ

ਤਲਾ ਵਿੱਚ ਨ੍ਹਾ ਰਹੀ ਹੈ.

ਮਲਾਹ ਰੋਟੀ ਦਾ ਟੁਕੜਾ

ਤੇ ਕਿਸ਼ਤੀ ਖਾ ਰਹੀ ਹੈ.

ਮੁੜੇਗੀ ਸਫ਼ਰ ਬਣ ਕੇ

ਜੋ ਮੰਜ਼ਿਲ ਜਾ ਰਹੀ ਹੈ.

ਹਾਂ,ਇਹ ਬਰਸਾਤ ਹੀ ਹੈ

ਜੋ ਅੱਗ ਬਰਸਾ ਰਹੀ ਹੈ. 

ਮੇਰੇ ਪਾਪਾਂ ਤੋਂ ਪਰਦੇ

ਇਹ ਗੰਗਾ ਲਾਹ ਰਹੀ ਹੈ.

ਮੇਰੀ ਛਾਂ ਤੇਰੀ ਛਾਂ ਨੂੰ

ਸਦਾ ਭਰਮਾ ਰਹੀ ਹੈ.

ਨਜ਼ਮਾਂ

ਇੱਕਮਿੱਕ 

ਤੂੰ ਕਹਿੰਦੀ ਹੈਂ 

ਕਿ ਮੈਂ "ਤੇਰੇ" 'ਤੇ 

ਕੋਈ ਕਵਿਤਾ ਲਿਖਾਂ,

ਪਰ ਮੈਂ 

"ਅਪਣੇ"

ਆਪ ਸੋਹਲੇ ਗਾਓਣ ਵਿੱਚ 

ਵਿਸ਼ਵਾਸ ਨਹੀਂ ਰੱਖਦਾ.    

ਮੈਂ ਅਜੇ ਜਾਗਾਂਗਾ

ਮੈਂ ਅਜੇ ਜਗਾਂਗਾ.

ਸੌਣ ਤੋਂ ਪਹਿਲਾਂ ਅਜੇ 

ਦੇਰ ਤੱਕ ਮਾਣਾਂਗਾ

ਕੰਮ ਨਾਲ਼ ਜੂਝਕੇ ਥੱਕੇ ਹੋਏ ਅੰਗਾਂ ਦੀ 

ਮਿੱਠੀ ਜਿਹੀ ਚੀਸ.

ਸੌਣ ਤੋਂ ਪਹਿਲਾਂ ਅਜੇ 

ਯਾਦ ਕਰਾਂਗਾ ਉਹ ਗੀਤ 

ਜੋ ਸੁਬ੍ਹਾ ਗਾਏ ਸੀ 

ਮੇਰੇ ਲਈ ਚਿੜੀਆਂ ਨੇ.

ਸੌਣ ਤੋਂ ਪਹਿਲਾਂ ਅਜੇ 

ਫਿਰ ਤੋਂ ਕਰਾਂਗਾ ਤਾਜ਼ਾ 

ਉਹ ਤਸੱਲੀ ਜੋ ਮਿਲੀ 

ਅੱਜ ਨੂੰ ਸਜਦੇ ਕਰਕੇ.

ਸੌਣ ਤੋਂ ਪਹਿਲਾਂ ਅਜੇ 

ਯਾਦ ਕਰਾਂਗਾ ਮੈਂ 

ਉਨ੍ਹਾਂ ਨਿੱਕੀਆਂ-ਵੱਡੀਆਂ ਪੀੜਾਂ ਨੂੰ 

ਜਿੰਨ੍ਹਾਂ ਨੇ ਰੱਖਿਆ ਮੈਨੂੰ ਪੱਬਾਂ ਭਾਰ.

ਸੌਣ ਤੋਂ ਪਹਿਲਾਂ ਅਜੇ 

ਯਾਦ ਕਰਾਂਗਾ ਕਿ ਕਿਵੇਂ 

ਕਿਨ੍ਹੇਂ ਹੀ ਚਾਂਭਲੇ ਡਰਾਂ ਨੇ ਮੈਨੂੰ 

ਰੱਜ ਕੇ ਕੀਤਾ ਹੈ ਖ਼ੁਆਰ.

ਸੌਣ ਤੋਂ ਪਹਿਲਾਂ ਅਜੇ 

ਦੇਰ ਤੱਕ ਪੀਵਾਂਗਾ

ਨਿੱਖਰੀ ਰਾਤ ਦੇ ਹੱਥਾਂ 'ਚੋਂ

ਮਸਤੀ ਦੇ ਜਾਮ.

ਸੌਣ ਤੋਂ ਪਹਿਲਾਂ ਅਜੇ 

ਜਾਗਦੇ ਹੁੰਗਾਰੇ ਲਈ 

ਪਾਵਾਂਗਾ 

ਜ਼ਿੰਦਗ਼ੀ ਦੇ ਹੁਸਨ ਦੀ ਬਾਤ.

ਸੌਣ ਤੋਂ ਪਹਿਲਾਂ ਅਜੇ  

ਰੌਸ਼ਨੀ ਦੇ ਹਰਫ਼ਾਂ ਨਾਲ਼

ਡਿੱਗੇ ਪੱਤਿਆਂ ਦੇ ਹੇਠੋਂ ਉੱਗ ਰਹੀਆਂ 

ਕੂਲ਼ੀਆਂ ਕਰੂੰਬਲਾਂ ਲਈ 

ਲਿੱਖਾਂਗਾ 

ਸ਼ੋਖ਼ ਫੁੱਲਾਂ ਦਾ ਵਸੀਅਤਨਾਮਾਂ.

ਸੌਣ ਤੋਂ ਪਹਿਲਾਂ ਅਜੇ 

ਕੱਲ੍ਹ ਲਈ ਰੱਖਾਂ

ਗਾ 

ਕੁਝ ਕੁ ਅਣਬੁੱਝੇ ਸਵਾਲ 

ਕੁਝ ਅਧੂਰੇ ਜਿਹੇ ਕਮਾਲ.

ਮੈਂ ਅਜੇ ਜਾਗਾਂਗਾ,

ਮੈਂ ਅਜੇ ਜਾਗਾਂਗਾ. 

ਸੰਪਰਕ –

ਨਿਰਮਲ ਦੱਤ

#3060, 47-ਡੀ,

ਚੰਡੀਗੜ੍ਹ।

ਮੋਬਾਈਲ -98760-13060

Contact –

Nirmal Datt

# 3060, 47-D,

Chandigarh.

Mobile-98760-13060