ਮੈਂ ਇੱਕ ਜਿੰਦਗੀ ਬਚਾਈ / ਜੇ ਐਸ ਮਾਹਿਰਾ

ਆਪ ਬੀਤੀ-ਜੱਗ ਬੀਤੀ

ਮੈਂ ਇੱਕ ਜਿੰਦਗੀ ਬਚਾਈ / ਜੇ ਐਸ ਮਹਿਰਾ  

 ਅੱਜ ਕੱਲ੍ਹ ਮੈਂ ਜਿੱਥੇ  ਨੌਕਰੀ ਕਰ ਰਿਹਾ ਹਾਂ ਉੱਥੇ ਸਮੇਂ  ਦੇ ਹਿਸਾਬ ਨਾਲ ਮੈਨੂੰ   ਸਵੇਰ ਦੀ ਤੇ ਦੁਪਹਿਰ ਦੀ ਰੋਟੀ ਨਾਲ ਲੈ ਕੇ ਜਾਣੀ ਪੈਂਦੀ ਹੈ ਤੇ ਕਈ ਵਾਰ ਰਾਤ ਦੀ ਰੋਟੀ ਵੀ ਬਾਹਰੋਂ ਹੀ ਮੰਗਵਾਉਣੀ ਪੈ ਜਾਂਦੀ ਹੈ।  ਅੱਜ ਵੀ ਰਾਤ ਦੀ ਰੋਟੀ ਮੰਗਵਾਉਣ ਦਾ ਸਮਾਂ ਹੋ ਗਿਆ ਸੀ ਕਿ ਅਚਾਨਕ ਦੂਜੇ ਮੁਲਾਜ਼ਮ ਨੇ ਆ ਡਿਊਟੀ ਸੰਭਾਲ ਲਈ ਤੇ ਮੈਂਨੂੰ ਛੁੱਟੀ ਹੋ ਗਈ।  ਮੈਂ ਬਹੁਤ ਥੱਕ ਗਿਆ ਸੀ ਇਸ ਲਈ ਘਰ ਵਾਪਸ ਜਾਂਦੇ ਵਕਤ ਮੈਂ ਥਕੇਵਾਂ ਲਾਹੁਣ  ਲਈ ਇੱਕ ਅੰਗਰੇਜ਼ੀ ਸ਼ਰਾਬ ਦਾ ਪਊਆ ਲੈ ਅਹਾਤੇ 'ਚ ਬੈਠ ਗਿਆ।  ਮੈਂ ਦੇਖਿਆ ਕਿ ਮੇਰੇ ਨਾਲ ਹੀ ਕੁਰਸੀ ਤੇ ਇੱਕ ਵੀਹ-ਬਾਈ  ਕੁ ਸਾਲ ਦਾ ਮੁੰਡਾ ਅੰਗਰੇਜ਼ੀ ਸ਼ਰਾਬ ਦੀ ਬੋਤਲ ਲੈ ਕੇ ਇਕੱਲਾ ਹੀ ਬੈਠਾ ਪੀ ਰਿਹਾ ਸੀ।  ਬੋਤਲ ਵਿੱਚੋਂ ਪਊਆ ਕੁ  ਉਹ ਪੀ ਚੁੱਕਿਆ ਸੀ ਤੇ ਅਜੇ ਪੌਣੀ ਬੋਤਲ ਬਾਕੀ ਪਈ ਸੀ।  ਮੈਂ ਦੇਖਿਆ ਕਿ ਉਹ ਵਾਰ ਵਾਰ ਕਿਸੇ ਨੂੰ ਫੋਨ ਕਰਦਾ ਪਰ ਉਹ ਉਸਦਾ ਫੋਨ ਨਾ ਚੁੱਕਦਾ ਤੇ ਉਹ ਪਰੇਸ਼ਾਨ ਹੋ ਫਟਾਫਟ  ਪੈਗ ਲਗਾਈ ਜਾਂਦਾ।  ਦੇਖਦੇ ਹੀ ਦੇਖਦੇ ਉਹ ਅੱਧੀ ਬੋਤਲ ਪੀ ਗਿਆ। ਉਹ ਰੋ ਵੀ ਰਿਹਾ ਸੀ ਤੇ  ਉਸਦੀਆਂ ਅੱਖਾਂ ਵਿੱਚੋਂ ਪਾਣੀ ਵਹਿ ਰਿਹਾ ਸੀ।  ਉਸ ਨੂੰ  ਮੈਂ ਪੁੱਛਿਆ,"ਕੀ ਗੱਲ ਹੋ ਗਈ ਬਾਈ ਕਾਕਾ"?

ਮੇਰੇ ਇਹ ਪੁੱਛਦੇ ਹੀ ਉਹ ਭੁੱਬਾਂ ਮਾਰ  ਉੱਚੀ ਉੱਚੀ ਰੋਣ ਲੱਗਿਆ ਤੇ ਕਿਹਾ , " ਸਰ ਜੀ ਅੱਜ ਮੇਰੀ ਆਖਰੀ ਰਾਤ ਹੈ। ਹੁਣ ਮੈਂ ਜੀਣਾ ਨਹੀਂ, ਮੇਰੀ ਮਸ਼ੂਕ ਮੈਨੂੰ ਧੋਖਾ ਦੇ ਗਈ ਹੈ।  ਪਿਛਲੇ ਪੰਜ ਸਾਲਾਂ ਦਾ ਪਿਆਰ ਸੀ ਉਸ ਦੇ ਨਾਲ, ਮੈਂ ਬੱਸ ਹੁਣ ਕਿਸੇ ਟਰੱਕ-ਟਰੁੱਕ  ਵਿੱਚ ਮੋਟਰਸਾਈਕਲ ਮਾਰਨਾ ਹੈ ਅੱਜ। " ਮੈਂ ਉਸ ਨੂੰ ਸਮਝਾਉਣ ਦੀ ਬਹੁਤ ਕੋਸ਼ਿਸ਼ ਕੀਤੀ ਪਰ ਉਹ ਸਮਝਣ ਦੇ ਹਾਲਾਤ ਵਿੱਚ ਨਹੀਂ ਸੀ। ਉਹ ਨਸ਼ੇ ਨਾਲ ਪੂਰੀ ਤਰ੍ਹਾਂ ਧੁੱਤ ਹੋ ਚੁੱਕਿਆ ਸੀ ਬਸ ਉਸ ਨੇ ਮਨ ਵਿੱਚ ਆਤਮ ਹੱਤਿਆ ਕਰਨ ਦਾ ਨਿਸ਼ਚਾ ਕਰ ਲਿਆ ਸੀ।  ਉਹ ਕੌਣ ਸੀ ਤੇ ਕਿੱਥੋਂ ਦਾ ਰਹਿਣ ਵਾਲਾ ਸੀ ਕੁਝ ਨਹੀਂ ਦੱਸ ਰਿਹਾ ਸੀ।  ਮੈਂ ਚਲਾਕੀ ਨਾਲ ਉਸ ਤੋਂ ਮੋਬਾਈਲ ਲਿਆ ਤੇ ਉਸ ਦੇ ਮੋਬਾਇਲ ਵਿੱਚੋਂ ਉਸਦੇ ਮਾਂ ਬਾਪ ਦਾ ਨੰਬਰ ਲੈ ਕੇ ਫੋਨ ਕਰਕੇ ਉਹਨਾਂ ਨੂੰ ਮੌਕੇ ਉੱਤੇ ਹੀ ਬੁਲਾ ਲਿਆ। ਮੁੰਡੇ ਦੇ ਪਿਓ  ਨੇ ਮੇਰਾ ਧੰਨਵਾਦ ਕਰਦੇ ਹੋਇਆ ਦੱਸਿਆ ਕਿ ਇਹ ਸਾਡਾ ਇਕਲੌਤਾ ਪੁੱਤਰ ਹੈ।  ਜੋ ਕਿ ਕਿਸੇ ਕੁੜੀ ਦੇ ਕਾਰਨ ਪਿਛਲੇ ਕੁਝ ਦਿਨਾਂ ਤੋਂ ਡਿਪਰੈਸ਼ਨ ਵਿੱਚ ਹੈ।  ਉਸ ਤੋਂ ਬਾਅਦ  ਉਹ ਉਸ ਨੂੰ ਆਪਣੇ ਨਾਲ ਲੈ ਗਏ।  ਦੂਜੇ ਦਿਨ ਮੈਨੂੰ ਸਵੇਰੇ 11 ਕੁ ਵਜੇ ਇੱਕ ਫੋਨ ਆਇਆ।  ਇਹ ਉਹੀ ਮੁੰਡਾ ਸੀ ਜੋ ਰਾਤ ਆਤਮ ਹੱਤਿਆ ਕਰਨ ਵਾਲਾ ਸੀ।  ਉਸ ਨੇ ਮੇਰਾ ਧੰਨਵਾਦ ਕਰਦਿਆਂ ਕਿਹਾ  "ਸਰ ਜੀ ਅਗਰ ਤੁਸੀਂ ਰਾਤ ਮੈਨੂੰ ਨਾ ਮਿਲਦੇ, ਮੇਰੇ ਮਾਂ ਬਾਪ ਨੂੰ ਨਾ ਬੁਲਾਉਂਦੇ ਤਾਂ ਮੈਂ ਸੱਚਮੁੱਚ ਹੀ ਆਤਮਹੱਤਿਆ ਕਰ ਲੈਣੀ ਸੀ ਤੇ ਇੱਕ ਕੁੜੀ ਕਰਕੇ ਆਪਣੇ ਮਾਂ ਬਾਪ ਦਾ ਜੀਵਨ ਨਰਕ ਬਣਾ ਦੇਣਾ ਸੀ।  ਹੁਣ ਮੈਨੂੰ ਸਮਝ ਲੱਗ ਗਈ ਹੈ ਕਿ ਕੋਈ ਰਾਤ ਆਖਰੀ ਨਹੀਂ ਹੁੰਦੀ ਤੇ ਹਰ ਅੰਤ ਨਵੀਂ ਸ਼ੁਰੂਆਤ ਹੁੰਦਾ ਹੈ।"

ਸੰਪਰਕ -

 ਪਿੰਡ ਤੇ ਡਾਕਘਰ ਬੜੌਦੀ ਤਹਿਸੀਲ ਖਰੜ,

ਜਿਲਾ ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ,

ਪਿੰਨ ਕੋਡ -140110

ਮੋਬਾਈਲ - 9592430420

ਇਹ ਵੀ ਪੜ੍ਹੋ -

ਮਿੱਟੀ ਦਾ ਮੋਹ / ਜੇ. ਐੱਸ ਮਹਿਰਾ