ਪੁਸਤਕ ਮੁਹੱਬਤਾਂ ਦੇ ਦੀਪ ਰਿਲੀਜ਼ ਹੋਈ

ਦਵਿੰਦਰ ਕੌਰ ਢਿਲੋਂ ਦਾ ਕਾਵਿ-ਸੰਗ੍ਰਹਿ ਲੋਕ-ਅਰਪਣ 

ਚੰਡੀਗੜ੍ਹ,28 ਫਰਵਰੀ (ਬਿਊਰੋ) 

ਸਾਹਿਤ ਵਿਗਿਆਨ ਕੇਂਦਰ ਚੰਡੀਗੜ੍ਹ ਦੀ ਵਿਸ਼ੇਸ਼ ਇਕੱਤਰਤਾ ਟੀ.ਐੱਸ. ਸੈਂਟਰਲ ਸਟੇਟ ਲਾਇਬ੍ਰੇਰੀ ਚੰਡੀਗੜ੍ਹ ਵਿਖੇ ਹੋਈ। ਜਿਸ ਵਿਚ ਕੇਂਦਰ ਦੀ ਜਨ; ਸਕੱਤਰ ਦਵਿੰਦਰ ਕੌਰ ਢਿੱਲੋਂ ਦਾ ਕਾਵਿ-ਸੰਗ੍ਰਹਿ " ਮੁਹੱਬਤਾਂ ਦੇ ਦੀਪ" ਲੋਕ-ਅਰਪਣ ਕੀਤਾ ਗਿਆ। ਪ੍ਰਧਾਨਗੀ ਮੰਡਲ ਵਿਚ ਜੇ.ਐੱਸ. ਖੁਸ਼ਦਿਲ (ਸਾਬਕਾ ਜਿਲ੍ਹਾ ਅਤੇ ਸੈਸ਼ਨਜ ਜੱਜ), ਡਾ: ਅਵਤਾਰ ਸਿੰਘ ਪਤੰਗ, ਪਰਮਜੀਤ ਕੌਰ ਪਰਮ, ਕੇੰਦਰ ਦੇ ਪ੍ਰਧਾਨ ਗੁਰਦਰਸ਼ਨ ਸਿੰਘ ਮਾਵੀ ਅਤੇ ਲੇਖਿਕਾ ਦਵਿੰਦਰ ਕੌਰ ਢਿੱਲੋਂ ਸ਼ਾਮਲ ਹੋਏ। ਪ੍ਰੋਗਰਾਮ ਦੀ ਸ਼ੁਰੂਆਤ ਸੁਰਜੀਤ ਸਿੰਘ ਧੀਰ ਵੱਲੋਂ ਕਿਤਾਬ ਵਿਚੋਂ ਗਾਏ ਗੀਤ ਨਾਲ ਹੋਈ।ਪ੍ਰਤਾਪ ਪਾਰਸ,ਦਰਸ਼ਨ ਤਿਊਣਾ, ਭਰਪੂਰ ਸਿੰਘ, ਸਿਮਰਜੀਤ ਗਰੇਵਾਲ, ਦਰਸ਼ਨ ਸਿੱਧੂ,ਨਰਿੰਦਰ ਕੌਰ ਲੌਂਗੀਆ ਨੇ ਵੀ ਕਿਤਾਬ ਵਿੱਚੋਂ ਗੀਤ ਸੁਣਾਏ।ਪ੍ਰਧਾਨਗੀ ਮੰਡਲ ਵੱਲੋਂ ਪੁਸਤਕ ਦਾ ਲੋਕ-ਅਰਪਣ ਪ੍ਰਭਾਵਸ਼ਾਲੀ ਢੰਗ ਨਾਲ ਕੀਤਾ ਗਿਆ।ਪਰਚਾ ਪੜ੍ਹਦਿਆਂ ਡਾ. ਅਵਤਾਰ ਸਿੰਘ ਪਤੰਗ ਨੇ ਕਿਹਾ ਕਿ ਕਵਿਤਾ ਲਿਖਣੀ ਕਰਤਾਰੀ ਵਰਤਾਰਾ ਹੈ।ਕਵਿਤਾ ਰੱਬ ਨੂੰ ਪਾਉਣ ਦੀ ਭਾਸ਼ਾ ਹੈ।ਇਸ ਕਿਤਾਬ ਵਿਚ ਦਵਿੰਦਰ ਢਿਲੋਂ ਨੇ ਬਹੁਤ ਸਾਰੇ ਸਮਾਜਿਕ ਵਿਸ਼ੇ ਛੋਹੇ ਹਨ।ਪਰਮਜੀਤ ਪਰਮ ਨੇ ਕਿਹਾ ਕਿ ਕਿਤਾਬ ਛੇ ਸਾਲ ਦੀ ਮਿਹਨਤ ਨਾਲ ਤਿਆਰ ਕੀਤੀ ਗਈ ਹੈ ਜੋ ਵਧੀਆ ਪਿਆਰ ਮੁਹੱਬਤ ਅਤੇ ਸਮਾਜ ਸੁਧਾਰ ਦੇ ਸੁਨੇਹੇ ਦਿੰਦੀ ਹੈ।ਦੀਪਕ ਸ਼ਰਮਾ ਚਨਾਰਥਲ ਨੇ ਕਿਹਾ ਕਿ ਦਵਿੰਦਰ ਕੌਰ ਗਾਉਣ ਤੋਂ ਲਿਖਣ ਵੱਲ ਪ੍ਰਤੀ ਹੈ ਜੋ ਇਸ ਦੇ ਦ੍ਰਿੜ ਇਰਾਦੇ ਦੀ ਮਿਸਾਲ ਹੈ।ਉਸ ਨੇ ਸਭ ਲੇਖਕਾਂ ਨੂੰ ਸਮਾਜਿਕ ਅਤੇ ਮਿਆਰੀ ਸਾਹਿਤ ਲਿਖਣ ਦੀ ਅਪੀਲ ਕੀਤੀ।ਜੇ. ਐੱਸ.ਖੁਸ਼ਦਿਲ ਨੇ ਆਪਣੇ ਭਾਸ਼ਨ ਵਿਚ ਪ੍ਰੋਗਰਾਮ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਨੌਜਵਾਨਾਂ ਨੂੰ ਸਾਹਿਤ ਨਾਲ ਜੋੜਨਾ ਚਾਹੀਦਾ ਹੈ।ਚੰਗਾ ਸਰੋਤਾ ਵਧੀਆ ਲਿਖ ਸਕਦਾ ਹੈ।ਮਹਿਮਾਨਾਂ ਨੂੰ ਅਤੇ ਸਹਿਯੋਗੀ ਮੈਂਬਰਾਂ ਨੂੰ ਸਨਮਾਨਿਤ ਕੀਤਾ ਗਿਆ।ਅਖੀਰ ਵਿਚ ਗੁਰਦਰਸ਼ਨ ਸਿੰਘ ਮਾਵੀ ਨੇ ਸਭ ਦਾ ਧੰਨਵਾਦ ਕੀਤਾ।ਸਟੇਜ ਸੰਚਾਲਨ ਵੀ ਗੁਰਦਰਸ਼ਨ ਸਿੰਘ ਮਾਵੀ ਵੱਲੋਂ ਕੀਤਾ ਗਿਆ।