ਸ਼ਬਦ ਚਾਨਣੀ---ਨਿਰਮਲ ਦੱਤ
ਗ਼ਜ਼ਲ
ਜਿਸਨੇ ਅਪਣੀ ਬਾਤ ਲਿਖੀ ਹੈ,
ਇੱਕ ਪਿਆਰੀ ਸੌਗਾਤ ਲਿਖੀ ਹੈ।
ਰਾਤਾਂ ਦੇ ਲਈ ਲਿਖੀਆਂ ਕਿਰਨਾਂ,
ਔੜਾਂ ਲਈ ਬਰਸਾਤ ਲਿਖੀ ਹੈ।
ਅਪਣਾ ਅਕਸ ਵੇਖ ਕੇ ਕਿਧਰੋਂ,
ਰੱਬ ਨੇ ਮੇਰੀ ਜ਼ਾਤ ਲਿਖੀ ਹੈ।
ਹੋਰਾਂ ਨੇ ਲਿਖਣੀ ਚਾਹੀ, ਪਰ,
ਮੈਂ ਅਪਣੀ ਔਕਾਤ ਲਿਖੀ ਹੈ।
ਦਿਨ ਚੜ੍ਹਿਆ ਤਾਂ ਦਿਨ ਲਿਖਿਆ ਮੈਂ,
ਰਾਤ ਪਈ ਜਦ, ਰਾਤ ਲਿਖੀ ਹੈ।
ਨਜ਼ਮ
ਦਿਲ ਨਹੀਂ ਕਰਦਾ
ਦਿਲ ਨਹੀਂ ਕਰਦਾ
ਕਿ ਬੱਸ ਐਵੇਂ ਲਿਖਾਂ
ਐਵੇਂ ਲਿਖ ਕੇ ਵਿਗਾੜਾਂ ਸ਼ਬਦ ਦਾ ਹੁਸਨ
ਐਵੇਂ ਲਿਖ ਕੇ ਕਰਾਂ ਕਾਗਜ਼ਾਂ ਦਾ ਕਤਲ
ਐਵੇਂ ਲਿਖ ਕੇ ਕਰਾਂ ਬੇ'ਜ਼ਤੀ ਕਲਮ ਦੀ;
ਦਿਲ ਇਹ ਕਰਦਾ ਹੈ
ਲਿੱਖਾਂ ਤਾਂ ਐਸੀ ਨਜ਼ਮ
ਜਿਸ 'ਚ ਸਭ ਜ਼ਿਕਰ ਹੋਵੇ
ਕਿ ਕਿੰਝ ਚੇਤਨਾ
ਬਣਕੇ ਮਿੱਟੀ ਤੇ ਪਾਣੀ
ਹਵਾ ਤੇ ਅਗਨ
ਸਿਰਜਦੀ ਹੈ ਆਕਾਰਾਂ ਦਾ ਇੱਕ ਸਿਲਸਿਲਾ;
ਮੇਰੀ ਇਸ ਨਜ਼ਮ ਵਿੱਚ
ਸ਼ੋਖ ਰੰਗਾਂ ਦਾ ਓਹੀਓ ਨਜ਼ਾਰਾ ਬਣੇ
ਜਿਹੜਾ ਸੂਰਜ ਦਾ ਬੱਦਲਾਂ 'ਤੇ ਉਪਕਾਰ ਹੈ,
ਓਹੀਓ ਸ਼ਬਦਾਂ, ਖ਼ਿਆਲਾਂ ਦਾ ਜਲਵਾ ਖਿੜੇ
ਜਿਹੜਾ ਸ਼ਾਹਕਾਰ ਗੀਤਾਂ ਦਾ ਸ਼ਿੰਗਾਰ ਹੈ;
ਮੇਰੀ ਇਸ ਨਜ਼ਮ ਵਿੱਚ
ਹੋਵੇ ਰੋਟੀ ਦੀ ਲੱਜ਼ਤ
ਤੇ ਫੁੱਲ ਦੀ ਮਹਿਕ,
ਥੋੜ੍ਹੀ ਚੁੰਮਣ ਦੀ ਮਸਤੀ
ਨਸ਼ਾ ਪਿਆਰ ਦਾ;
ਦਿਲ ਇਹ ਕਰਦਾ ਹੈ
ਲਿੱਖਾਂ ਤਾਂ ਐਸੀ ਨਜ਼ਮ
ਜਿਸ ਨੂੰ ਪੜ੍ਹ ਕੇ
ਮਨਾਂ ਵਿੱਚ ਵਸੇ ਰੌਸ਼ਨੀ
ਜਿਹੜੀ ਰਿਸ਼ੀਆਂ ਦੇ ਚਿੰਤਨ ਤੋਂ ਲੈ ਕੇ ਜਨਮ
ਦੱਸਦੀ ਹੈ
ਕਿ ਧਰਤੀ 'ਤੇ ਸਭ ਠੀਕ ਹੈ:
ਦੁੱਖ ਨੇ, ਤਾਹੀਓਂ ਸੁੱਖਾਂ ਦੀ ਪਹਿਚਾਣ ਹੈ,
ਡਰ ਦੇ ਜਜ਼ਬੇ 'ਚੋਂ ਹਸਤੀ ਬਣੀਂ ਆਸ ਦੀ;
ਦਿਲ ਇਹ ਕਰਦਾ ਹੈ
ਲਿੱਖਾਂ ਤਾਂ ਐਸੀ ਨਜ਼ਮ
ਜਿਸ ਨੂੰ ਪੜ੍ਹ ਕੇ ਇਹ ਲੱਗੇ
ਮਿਰਤ-ਲੋਕ ਵਿੱਚ
ਇਹ ਜੋ ਜੀਵਨ ਹੈ
ਅਦਭੁਤ ਕ੍ਰਿਸ਼ਮਾਂ ਹੈ ਇਹ;
ਦਿਲ ਨਹੀਂ ਕਰਦਾ
ਕਿ ਬੱਸ ਐਵੇਂ ਲਿਖਾਂ,
ਦਿਲ ਨਹੀਂ ਕਰਦਾ
ਕਿ ਬੱਸ ਐਵੇਂ ਲਿਖਾਂ...!
ਸੰਪਰਕ –
#3060, 47-ਡੀ,
ਚੰਡੀਗੜ੍ਹ।
ਮੋਬਾਈਲ -98760-13060
Contact –
Nirmal Datt
# 3060, 47-D,
Chandigarh.
Mobile-98760-13060
0 Comments
ਦੋਸਤੋ ਅਗਰ ਰਚਨਾ ਪਸੰਦ ਆਈ ਤਾਂ ਆਪਣੇ ਵਿਚਾਰ ਕਮੈਂਟ ਬਾਕਸ ਵਿੱਚ ਜ਼ਰੂਰ ਲਿਖੋ। ਕਮੈਂਟ ਦੇ ਨਾਲ ਆਪਣਾ ਨਾਮ ਪਤਾ ਵੀ ਜ਼ਰੂਰ ਲਿਖੋ ਜੀ।ਇਸ ਪੋਸਟ ਨੂੰ ਤੁਸੀਂ ਆਪਣੇ ਸ਼ੋਸਲ ਮੀਡੀਆ ਅਕਾਊਂਟ 'ਤੇ ਸ਼ੇਅਰ ਵੀ ਕਰ ਸਕਦੇ ਹੋ।ਸ਼ੇਅਰ ਕਰਨ ਲਈ ਇੱਥੇ ਦਿਖਾਈ ਦੇ ਰਹੇ ਸ਼ੋਸਲ ਮੀਡੀਆ ਦੇ ਉਸ ਚਿੰਨ ਉੱਪਰ ਕਲਿੱਕ ਕਰੋ ਜਿਸ ਉੱਪਰ ਤੁਸੀਂ ਪੋਸਟ ਨੂੰ ਸ਼ੇਅਰ ਕਰਨਾ ਹੈ। ਉਸ ਤੋਂ ਬਾਅਦ ਸ਼ੇਅਰ ਕਰ ਦਿਓ।
Friends, if you like the article/story/poetry, then write your thoughts in the comment box. Please write your name and address along with the comment. You can also share this post on your social media account. To share, click on the social media icon on which you want to share the post. After that share it.