ਸ਼ਬਦ ਚਾਨਣੀ---ਨਿਰਮਲ ਦੱਤ
ਗ਼ਜ਼ਲ
ਸਫ਼ਰ 'ਚ ਔਖ ਵੀ ਹੋਵੇਗੀ ਕੁਝ
ਮਲਾਲ ਨਾ ਕਰ,
ਕੋਈ ਜਵਾਬ ਵੀ ਦੱਸਦੇ
ਸਿਰਫ਼ ਸਵਾਲ ਨਾ ਕਰ.
ਜੋ ਚੀਖ਼ ਮਾਰਕੇ ਜੰਮਦਾ ਹੈ
ਹਸਦਾ-ਹਸਦਾ ਮਰੇ,
ਬੱਸ ਇਹ ਨਿਜ਼ਾਮ ਹੀ ਕਾਫ਼ੀ ਹੈ
ਕੋਈ ਕਮਾਲ ਨਾ ਕਰ.
ਜੇ ਸੱਚ ਨੂੰ ਮਿਲਣਾ ਹੈ
ਤਾਂ ਖੋਲ੍ਹ ਦਿਲ ਦੀਆਂ ਤੈਹਾਂ,
ਕਿਸੇ ਕਿਤਾਬ, ਕਿਸੇ ਬੁੱਤ 'ਚ
ਸੱਚ ਦੀ ਭਾਲ਼ ਨਾ ਕਰ.
ਲਹੂ ਰਗਾਂ 'ਚ ਰਹੇ,
ਨਾ ਵਹੇ ਇਹ ਨੈਣਾਂ 'ਚੋਂ;
ਏਹੀ ਹੈ ਹਾਲ, ਤੂੰ ਖ਼ੁਦ ਨੂੰ
ਕਦੇ ਬੇਹਾਲ ਨਾ ਕਰ.
ਓਹ ਇੱਕ ਵਜਦ ਹੀ ਹੈ
ਜਿਸ 'ਚੋਂ ਇਹ ਸਭ ਵਜੂਦ ਬਣੇਂ,
ਬੱਸ ਓਸ ਵਜਦ 'ਚ ਜੀਅ
ਹੋਰ ਕੋਈ ਖ਼ਯਾਲ ਨਾ ਕਰ.
ਨਜ਼ਮ
ਕਹਿ ਦੇਣਾ
ਮੇਰੇ ਲਈ ਸੁਨੇਹਾ ਆਵੇ
ਜਾਂ ਕੋਈ ਮੈਂਨੂੰ ਮਿਲਣਾ ਚਾਹਵੇ
ਕਹਿ ਦੇਣਾ
ਠਹਿਰੇ ਪਾਣੀ 'ਚੋਂ
ਸੱਭਿਅਤਾ ਦਾ ਪਰਛਾਵਾਂ ਤੱਕ ਕੇ
ਰਾਤਾਂ ਵਿੱਚ ਲੁਕਦਾ ਫਿਰਦਾ ਹੈ;
ਕਹਿ ਦੇਣਾ
ਦਿਲ ਦੇ ਬੂਹੇ 'ਤੇ
ਹੁੰਦੀ ਵੈਰਾਗੀ ਦਸਤਕ 'ਚੋਂ
ਪਾਗ਼ਲਪਨ ਦੇ ਸੁਰ ਸੁਣਦਾ ਹੈ;
ਕਹਿ ਦੇਣਾ
ਅੱਖਰਾਂ ਸੰਗ ਮਿਲ ਕੇ
ਸ਼ਬਦਾਂ ਦੇ ਜੰਗਲ ਵਿੱਚ ਕਿਧਰੇ
ਅਰਥਾਂ ਪਿੱਛੇ ਦੌੜ ਰਿਹਾ ਹੈ;
ਕਹਿ ਦੇਣਾ
ਤ੍ਰਿਸ਼ਨਾ ਦੀਆਂ ਅੰਨ੍ਹੀਆਂ
ਗਲ਼ੀਆਂ ਦੇ ਵਿੱਚ ਅਲਖ ਜਗਾ ਕੇ
ਸੰਤੁਸ਼ਟੀ ਦਾ ਦਰ ਲੱਭਦਾ ਹੈ;
ਕਹਿ ਦੇਣਾ
ਰੂਹ ਦੇ ਜ਼ਖ਼ਮਾਂ ਲਈ
ਕਵਿਤਾਵਾਂ ਦਾ ਲੇਪ ਬਣਾ ਕੇ
ਰਾਹਤ ਦੇ ਰਸਤੇ ਦੱਸਦਾ ਹੈ;
ਕਹਿ ਦੇਣਾ
ਅੰਬਰਾਂ ਵਿੱਚ ਜਾ ਕੇ
ਚੰਨ, ਸੂਰਜ ਨਾਲ ਹੱਥ ਮਿਲਾ ਕੇ
ਧਰਤੀ ਲਈ ਮਿਹਰਾਂ ਮੰਗਦਾ ਹੈ;
ਕਹਿ ਦੇਣਾ
ਛਾਵਾਂ 'ਚੋਂ ਚੁਭਦੀ ਠੰਡ ਮਿਟਾ ਕੇ
ਧੁੱਪਾਂ ਵਿੱਚੋਂ ਜਲ਼ਦੀ ਹੋਈ ਤਪਸ਼ ਹਟਾ ਕੇ
ਅਪਣੇ ਘਰ ਨੂੰ ਪਰਤ ਰਿਹਾ ਹੈ...!
ਸੰਪਰਕ –
#3060, 47-ਡੀ,
ਚੰਡੀਗੜ੍ਹ।
ਮੋਬਾਈਲ -98760-13060
Contact –
Nirmal Datt
# 3060, 47-D,
Chandigarh.
Mobile-98760-13060
0 Comments
ਦੋਸਤੋ ਅਗਰ ਰਚਨਾ ਪਸੰਦ ਆਈ ਤਾਂ ਆਪਣੇ ਵਿਚਾਰ ਕਮੈਂਟ ਬਾਕਸ ਵਿੱਚ ਜ਼ਰੂਰ ਲਿਖੋ। ਕਮੈਂਟ ਦੇ ਨਾਲ ਆਪਣਾ ਨਾਮ ਪਤਾ ਵੀ ਜ਼ਰੂਰ ਲਿਖੋ ਜੀ।ਇਸ ਪੋਸਟ ਨੂੰ ਤੁਸੀਂ ਆਪਣੇ ਸ਼ੋਸਲ ਮੀਡੀਆ ਅਕਾਊਂਟ 'ਤੇ ਸ਼ੇਅਰ ਵੀ ਕਰ ਸਕਦੇ ਹੋ।ਸ਼ੇਅਰ ਕਰਨ ਲਈ ਇੱਥੇ ਦਿਖਾਈ ਦੇ ਰਹੇ ਸ਼ੋਸਲ ਮੀਡੀਆ ਦੇ ਉਸ ਚਿੰਨ ਉੱਪਰ ਕਲਿੱਕ ਕਰੋ ਜਿਸ ਉੱਪਰ ਤੁਸੀਂ ਪੋਸਟ ਨੂੰ ਸ਼ੇਅਰ ਕਰਨਾ ਹੈ। ਉਸ ਤੋਂ ਬਾਅਦ ਸ਼ੇਅਰ ਕਰ ਦਿਓ।
Friends, if you like the article/story/poetry, then write your thoughts in the comment box. Please write your name and address along with the comment. You can also share this post on your social media account. To share, click on the social media icon on which you want to share the post. After that share it.